તમે જેવું વિચારો છો, તેવું જ મેળવો છો

 તમે જેવું વિચારો છો, તેવું જ મેળવો છો

તાજેતરમાં એક વિમાન પ્રવાસ દરમિયાન બારીની બહાર જોતી વખતે હું મંત્રમુગ્ધ થઈ ગઈ. આકાશ સોનેરી આભા છોડીને ધીમે ધીમે ઘેરા વાદળી રંગમાં પરિવર્તિત થઈ રહ્યું હતું. જેમ જેમ જમીન પરના દ્રશ્યો ધૂંધળા થતા ગયા, તેમ તેમ મને એક ઊંડો વિચાર આવ્યો. આ અનંત આકાશ આપણા જીવનની અસીમ શક્યતાઓનું જ પ્રતિબિંબ છે. આ બદલાતા આકાશને જોઈને મને લો ઓફ એટ્રેક્શન એટલે કે આકર્ષણના નિયમની યાદ આવી. જે રીતે આકાશ ક્ષણે ક્ષણે બદલાય છે, તેવી જ રીતે આપણા વિચારો અને ભાવનાઓ આપણી વાસ્તવિકતાને આકાર આપે છે.

આ સંદર્ભમાં મને ગાયિકા શ્રેયા ઘોષાલનો એક ઇન્ટરવ્યુ યાદ આવે છે. તેમણે ખૂબ સુંદર વાત કરી હતી કે હવે તેઓ ગીતોની પસંદગી કરતી વખતે ખૂબ સભાન રહે છે. તેઓ એવા જ શબ્દો કે સુરાવલીઓ પસંદ કરે છે જે તેમના જીવનના મૂલ્યો સાથે મેળ ખાતા હોય. તેમનું માનવું છે કે આપણે જે ગાઈએ છીએ કે બોલીએ છીએ, તે આપણી આસપાસ એક ઉર્જાનું નિર્માણ કરે છે. આ જ તો આકર્ષણનો નિયમ છે. તમે જે બ્રહ્માંડને આપો છો, તે જ બમણું થઈને તમારી પાસે પાછું આવે છે.

લો ઓફ એટ્રેક્શનનો સાદો સિદ્ધાંત છે સમાનતા સમાનતાને આકર્ષે છે. જો આપણે સતત નિષ્ફળતા, બીમારી કે અભાવનો વિચાર કરીશું, તો અજાણતા જ આપણે એવા સંજોગોને આમંત્રણ આપીએ છીએ. પરંતુ જો આપણું મન કૃતજ્ઞતા, સફળતા અને સકારાત્મકતાથી ભરેલું હશે, તો કુદરત પણ આપણને એ જ દિશામાં દોરી જશે. મેં પોતે જ્યારે સાંભળવાની ક્ષતિ ધરાવતા બાળકો સાથે સમય વિતાવ્યો, ત્યારે આ વાતનો સાક્ષાત્કાર થયો. શારીરિક પડકારો હોવા છતાં, તે બાળકોના ચહેરા પરની સ્મિત અને આશાવાદ અદભૂત હોય છે. તેઓ પોતાની મર્યાદાઓ પર રડવાને બદલે પોતાની શક્તિઓ પર ધ્યાન કેન્દ્રિત કરે છે, અને એટલે જ તેઓ જીવનમાં વધુ સુખી રહી શકે છે.

આ નિયમ માત્ર આધ્યાત્મિક નથી, પણ વ્યવહારિક રીતે પણ સાબિત થયેલો છે. બોલિવૂડના કિંગ ખાન, શાહરૂખ ખાનનું ઉદાહરણ લો. જ્યારે તેમની પાસે રહેવા માટે ઘર નહોતું, ત્યારે પણ તેઓ મુંબઈના દરિયા કિનારે ઊભા રહીને કહેતા હતા કે એક દિવસ હું આ શહેર પર રાજ કરીશ. તેમનો આ અડગ વિશ્વાસ અને વિઝ્યુલાઇઝેશને જ આજે તેમને આ સ્થાને પહોંચાડ્યા છે. આવી જ રીતે હોલીવુડ અભિનેતા જિમ કેરીએ પોતાની જાતને ૧૦ મિલિયન ડોલરનો ચેક લખી આપ્યો હતો અને તે ચેક તેઓ વર્ષો સુધી વોલેટમાં રાખતા. પાંચ વર્ષ પછી, તેમને એક ફિલ્મ માટે બરાબર તેટલી જ રકમ મળી! ઓપ્રા વિન્ફ્રે પણ હંમેશા કહે છે કે, "તમે એ નથી મેળવતા જે તમે ઈચ્છો છો, તમે એ મેળવો છો જેમાં તમે વિશ્વાસ રાખો છો.

આજે યુવા પેઢીમાં 'જીબલી આર જેવી કળાઓ લોકપ્રિય થઈ રહી છે. તેના સુંદર, સ્વપ્નિલ અને પ્રકૃતિની નજીક રહેલા દ્રશ્યો માણસને માનસિક શાંતિ આપે છે. આ પણ એક પ્રકારનું સકારાત્મક આકર્ષણ જ છે. આપણા શાસ્ત્રોમાં પણ આ વાત વણાયેલી છે. શ્રીકૃષ્ણ ભગવદ ગીતામાં શ્રદ્ધાનો મહિમા સમજાવતા કહે છે કે તમારા વિચારો જ તમારું ભાગ્ય છે. હમણાં ગૂડી પડવા પર એવી પણ ચર્ચા થઈ હતી કે શ્રીકૃષ્ણ પુનઃ સ્થાપના કરશે, જેનો અર્થ એ પણ કાઢી શકાય કે જ્યારે આપણે ધર્મના માર્ગે ચાલીએ છીએ અને સકારાત્મક રહીએ છીએ, ત્યારે આખું બ્રહ્માંડ આપણને મદદ કરવા માટે એકઠું થાય છે.

રોજિંદા જીવનમાં આકર્ષણનો નિયમ એટલે માત્ર બેસીને સપના જોવા એવું નથી, પરંતુ તે દિશામાં સજાગ પગલાં લેવા તે છે. તમે જીવનમાં શું મેળવવા માંગો છો તેની સ્પષ્ટતા રાખો. ફરિયાદ કરવાને બદલે, તમારી પાસે જે છે તેના માટે આભાર માનો. તમે તમારા લક્ષ્યને પ્રાપ્ત કરી લીધું છે તેવો અનુભવ કરો. નકારાત્મક વાતો અને નકારાત્મક લોકોથી અંતર જાળવો.

જીવનમાં પડકારો તો આવવાના જ છે, પણ આપણી પ્રતિક્રિયા આપણું ભવિષ્ય નક્કી કરે છે. વિમાનમાં બેસીને મેં જોયેલું તે ક્ષિતિજ આજે પણ મને યાદ અપાવે છે કે આ જીવન મર્યાદિત નથી. જો આપણે આપણા મનનો દ્રષ્ટિકોણ બદલીએ, તો આખી દુનિયા બદલાતા વાર નહીં લાગે. ચાલો, આજથી જ સકારાત્મકતાના બીજ વાવીએ અને એક સુંદર જીવનનું નિર્માણ કરીએ.